"मुख्यमंत्री देवेंद्र फडणवीस यांनी राज्यपालांच्या अभिभाषणावरील चर्चेला उत्तर देताना हिंदी भाषा वाद, दावोस करार, टिपू सुलतान, मराठी शाळा, बेरोजगारी आणि गुंतवणुकीपासून ते एसीबीच्या कारवाईपर्यंत अनेक मुद्द्यांवर भाष्य केले. युवा प्रशिक्षण अभियानावरून विरोधकांना घेरतानाच राज ठाकरे यांनाही टोला लगावला."
मुंबई: राज्य सरकारचे अर्थसंकल्पीय अधिवेशन सुरू असून, विधानसभेत मुख्यमंत्री देवेंद्र फडणवीस यांनी राज्यपालांच्या अभिभाषणावर चर्चा करताना सुमारे दोन तास विविध मुद्द्यांवर भाष्य केले. यावेळी त्यांनी विरोधकांवर निशाणा साधतानाच राज्यातील विकासकामे, गुंतवणूक आणि विविध विषयांवर सरकारची भूमिका स्पष्ट केली.
विरोधकांवर टीका:
मुख्यमंत्री फडणवीस म्हणाले, "विरोधी पक्ष हा भ्रमित आणि संभ्रमित आहे. भ्रमात राहून धावण्यापेक्षा संभ्रमातून बाहेर पडून महाराष्ट्राच्या हितासाठी योगदान द्यावे." तसेच, विरोधकांनी चहापानापासून राजकारण सुरू केल्याचा टोला लगावत ते म्हणाले, "आम्ही गोकुळ दुधाचा चहा पाजला असता, काळा नव्हे."
हिंदी-मराठी भाषा वाद:
हिंदी भाषा सक्तीच्या मुद्द्यावरून मुख्यमंत्र्यांनी माहिती दिली की, नवीन शैक्षणिक धोरणासाठी २०२० मध्ये उद्धव ठाकरे सरकारने स्थापन केलेल्या समितीनेच हिंदी आणि इंग्रजी सक्तीची करण्याची शिफारस केली होती. "हा अहवाल उद्धव ठाकरे यांच्या मंत्रिमंडळाने स्वीकारला. आता यासाठी आम्हाला का लक्ष्य केले जाते?" असा सवाल त्यांनी केला. महाराष्ट्रात ८४ टक्के शाळा मराठी माध्यमाच्या असून ६९ टक्के विद्यार्थी मराठी शिकत असल्याचे त्यांनी स्पष्ट केले.
मुख्यमंत्री युवा प्रशिक्षण अभियान:
आमदार भास्कर जाधव यांनी उपस्थित केलेल्या प्रश्नावर बोलताना फडणवीस म्हणाले, "हे प्रशिक्षण ११ महिन्यांचे असून उमेदवारांना अनुभवपत्र देण्यात येते, जेणेकरून त्यांना नोकरी मिळण्यास मदत होईल. प्रशिक्षणार्थींना कायम करण्याचे आश्वासन दिल्याचा आरोप चुकीचा असून, असा पुरावा असल्यास तो राज्यपालांकडे पाठवण्यात येईल."
टिपू सुलतान आणि राज ठाकरे यांना टोला:
टिपू सुलतान यांच्यासह इतर ऐतिहासिक मुद्द्यांवर भाष्य करताना फडणवीस म्हणाले की, इतिहासाचे राजकारण करू नये. राज ठाकरे यांच्या नावाचा उल्लेख न करता त्यांनी टोला लगावला, "दोन भाऊ एकत्र आणण्याचे श्रेय मलाच आहे. करून करून भागले आणि आता देवपूजेला लागले."
दावोस करार आणि गुंतवणूक:
दावोसमध्ये झालेल्या करारांचा बचाव करताना मुख्यमंत्री म्हणाले की, "दावोस हे गंभीर व्यवसायाचे ठिकाण आहे. अमेरिकेचे राष्ट्राध्यक्ष डोनाल्ड ट्रम्पही तेथे दोन दिवस राहतात. जगासोबत चालण्यासाठी तेथे जाणे आवश्यक आहे." महाराष्ट्र देशातील स्टार्टअप हब असून २० टक्के स्टार्टअप आणि २८ युनिकॉर्न राज्यात असल्याचे त्यांनी सांगितले. गडचिरोलीत २.६८ लाख कोटींची गुंतवणूक होत असून तेथे ९० टक्के स्थानिकांना रोजगार मिळाल्याचेही त्यांनी सांगितले.
अर्थव्यवस्था आणि रोजगार:
गेल्या १० वर्षात महाराष्ट्राची अर्थव्यवस्था तीन पटींनी वाढून ५१ लाख कोटींवर पोहोचली असल्याचे फडणवीस म्हणाले. २०४७ पर्यंत ५ ट्रिलियन डॉलरची अर्थव्यवस्था करण्याचे उद्दिष्ट असल्याचे सांगतानाच, सध्या बेरोजगारीचा दर ३.१ टक्के असल्याचे त्यांनी स्पष्ट केले. सरकारने १ लाख २० हजारांहून अधिक नोकऱ्या दिल्या असून हा आकडा दीड लाखापर्यंत जाईल, अशी माहितीही दिली.
एसीबी कारवाई आणि नरहरी झिरवाळ प्रकरण:
नरहरी झिरवाळ यांच्या कार्यालयावर झालेल्या छाप्याचा उल्लेख करताना मुख्यमंत्री म्हणाले, "एसीबीचे छापे सुरूच राहतील. मंत्री किंवा माझ्याच कार्यालयात कोणी पैसे मागितल्यास तेथेही छापा टाकला जाईल. एसीबीला कोणाच्याही परवानगीची गरज नाही."
कुंभमेळा आणि महाराष्ट्राचे ब्रँडिंग:
कुंभमेळ्यात महाराष्ट्राचे ब्रँडिंग करण्यावर भर देताना फडणवीस म्हणाले की, "कुंभमेळ्यामुळे उत्तर प्रदेशचे ब्रँडिंग झाले. आपणही संतांच्या भूमीचे जागतिक स्तरावर ब्रँडिंग करू."
إرسال تعليق